* الا كنت كتحضري الكسكس ملي طحني او تحكي مطيشة لي غادي تزيدي في الاخير طحني معاها طريف ديال القرعة حمرا تيختر المرقة و يزيدها لذة.
* ليشو ملي نبغيو نعملوه في الكسكس نقطعوه كيفما بغينا على 2 او 4 و نعملوه في الماء مخلط مع 3 معالق كبار الدقيق و نخليوه 5دقائق عاد نغسلوه و نعملوه في المرقة هاد الطريقة تتخرج لنا الاوساخ و الدويدات لي تيكونو الداخل فيه.
* الا عملنا كسكسو و شاطت لنا المرقة نزيدو عليها بطاطا حتى تطيب و نطحنوه و ها الشوربة واجدة و الا شاط لنا سميد مفور نزيدو عليه مطيشة منقية و مقشرة بلا زرارع و مقطعة صغيرة و بصلة مشلظة رقيقة و خيار مقطع رقيق و درة و العطرية و زيت العود و ها شلاظة واجدة.
* الا كنا غنديرو كسكسو ملي نقطعو البصلة نشلظو معاها شوية ليشو كيختر المرقة و كيعطيها بنة زوينة.
* كاين لي عزيز عليها الحراق مع كسكسو ولكن مالين دار متياكلوش الحار و كتخاف ديك الحراقة طرطق في البرمة و تطلق. الحل اختي شدي حراقتك و دفنيها في كسكسو ملي تكوني تفوريه و بهاد طريقة حريريقتك غادي تطيب بسلام و تعطي بنة زوينة في كسكسو.
* ملي تكوني توجدي الكسكس قبل التفويرة الاخيرة عوض الماء سقيه شوية من المرق ديالو كيجي مشرب و بنين.
ليست هناك تعليقات: