استعملات بيكاربونات صودا الجزء الأول

السلام عليكم

اليوم ان شاء الله فقرة جديدة من فقرة نصيحة خصصتها لبيكاربونات صودا لكثرة الفوائد و الاستعمالات ديالها اليوم ان شاء الله غادي نتكلم على  استعملاتها في التنظيف فقط و في الأجزاء الأخرى غادي نتعرفو على استعملاتها في مجال التجميل و الطبخ نبدا على بركة الله:

* ملي تشري صابون ديال المكينة ديال التصبين زيدي فيه نصف كأس من بيكاربونات صودا و خلطي مزيان حتى يتجانسو مع بعضياتهم هاد الطريقة تتزيد من فعالية الصابون وتخرج الحوايج نقيين و تيشعلو.

* نفس الشيء بالنسبة لسائل تنظيف ديال الأواني كتخليه يعطي الرغوة اكثر و في نفس الوقت كتقتل الميكروبات.

* المنادل ديال الطبلة و الاسفنجة باش تنمسحو لفابو ملي نسالي منهم نرقدهم في الماء سخون مخلط معاه شوية بيكاربونات صودا باش تزول منهم الريحة يتنقاو و يبقاو صالحين مدة طويلة.

* الا وليداتك زوقو لك الحيط بالملونات خودي اسفنجة رطبة ناشفة عملي عليها بيكاربونات صودا و مسحي بها الحيط كتنقي الحيط بلا متأثر على الصباغة ديالو.

* الا كان الحداء ديالك او السبرديلا كتدير لك ريحة خايبة في رجليك ملي تحيديها رشي فيها بيكاربونات صودا و خليها الوقت لي بغيتي تلبسيها تاني غير سوسيها و لبسيها.

* عملي شوية بيكاربونات صودا في شي زلافة صغيرة و عمليها في ثلاجة و كل يومين ولا 3 ايام حركيها كتحيد جميع الروائح لي في ثلاجة ملي تكمل شهر بدليها بكمية اخرى.

* سطل ديال الزبل حشاكم قبل ما تعملي فيه البلاستيكة رشي فيها شوية بيكاربونات صودا مخلطة مع قطرات من الزيت العطري لي كتبغي و ممكن تعمليها غير وحدها كتمتص جميع الروائح الكريهة.

* نخلطو بيكاربونات صودا مع شوية الماء بحيث تكون عاقدة شوية و نحك بها أواني الفضة و نعاودوهم بزيف ناشف تيخرجو تيشعلو.

* الشبكة لي كتجمعي فيها الحوايج مسخين رشي في القاع تاعها او فوق الحوايج شوية بيكاربونات صودا باش تحيد ريحة الوسخ و العرق حتى نبغي نصبنوهم.

* الخشبة لي تنقطعو فوقها الربيع البصل ........ نرشو عليها بيكاربونات صودا مكتبقاش شادة ريحة الحوايج لي قطعنا فوقها.

* نخلطو بيكاربونات صودا مع الماء سخون على شكل كريمة و نحك به ما بين الزليج تيخليه نقي كيف الاول.

* نعملو بيكاربونات صودا في بونجة رطبة و مسحي بها طبالي لي مصبوغين و عاوديهم بزيف ناشف كتخليهم تيشعلو و تحافظ على صباغتهم.

* ملي نجمعو حوايج الصيف او الشتاء حسب الموسم لي حنا فيه قبل مانخزنوهم نرشو تحتهم شوية بيكاربونات صودا باش أوليس فيهم ريحة الغمال.

المهم كاين مزال الخير نكتفي اليوم بهاد البركة حتى الجزء التاني ان شاء الله و نكمل. نتمنى نكون فدتكم بهاد الأفكار ان شاء الله.