تدابير منزلية رائعة و مفيدة

* الا شاط لك شوية الكرص و قساح متلوحيهش قطعيه على شكل فقاص و حمريه اولا حكيه و عمليه في الفريكو حتى النصيحة التالية و نقول لك اش تعملي به.

* الكرص لي شاط لك و الطريفات ديال الكيكة لي جمعتي و الا بقات عندك شي حلوة حتى هي بردات حكي كلشي زيدي عليها زبيب و الفوكه الجافة لي متوفر عندك و جمعيها اما بنيسلي او العسل عمليها كويرات و غطسيها في شكلاط أو حشي بها الشكلاط لي تيتعمل في مول سيليكون.

* الكيكة الا شاطت لك و نشفات قطعيها طريفات و عمليهم في كويسات. حضري فلان بالمداق لي عجبك و فرغيه فوقها و دخليه يبرد وهانتي وجدتي ديسير للصحور.

* الا كنت عاملة شوربة غتزيدي فيها كريمة حاولي تسخني كريمة بوحدها في اناء لحقاش بعض المرات ملي كتضيفيها كتختر و كتكتل لك في الشوربة.

* الا ما بقاش لنا البيض باش ندهنو الفطائر ناخد 2 معالق كبار نيدو ندوبوهم في كاس ماء دافئ مع رشة نسكافي و ندهنو الفطائر ديالنا و ندخلهم الفرن.

* الا شاط لك الفلان طحنيه مع عصير البرتقال و هانتي حصلتي على عصير منعش و الا كان تاع الشكلاط طحنيه مع الحليب و هانتي حصلتي على مشروب الشكلاط بارد.

* في رمضان بزاف منكم لي تيسلقو البيض في الفطور داك الما لي تسلق فيه البيض نخليوه تيبرد و نسقيو به النباتات الا كانت عندنا في الدار و كدلك القشور حتى هما نفرتوهم و نلوحهم في تراب ديالها لانه مثل السماد تيغدي التربة.

* الا حكيتي الفرماج في الحكاكة و لصق لك فيها ملي تسالي حكي فيها واحد البطاطة راها تتنقى و ماكيبقى فيها والو، و هديك البطاطا لي حكيتي زيدي عليها شوية العطرية و البيض وها الاومليط واجد.

* في رمضان كنستهلك التمر بزاف حاولو متلوحوش العظام دياله ممكن تنشفوهم مزيان و دخلوهم الفرن يتحمرو شوية ثم طحنوهم و تشطوهم اما تستعملوهم ككحل للعين فهو مفيد للعين او الناس لي تتبغي القهوة و كتخاف من الكافيين ممكن تاخدي داك المسحوق لي حصلتي عليه و تزيدي عليه عطرية ديال القهوة و ها القهوة عندك بلا كافييين و هاد القهوة راها موجودة في الاسواق كتباع.

* الا كنا عاملين معجنات مالحة ندهنها بشوية الزبدة مدوبة مخلط معها شوية الملح ابزار ثومة محكوكة و شوية المعدنوس مدقوق كتعطي بنة زوينة للمملحات.