دجاج معمر و محمر في الفرن

المقادير : 

* الدجاج
* قزبر و معدنوس مدقوقين

* شوية السمن حر

* زعفران زغبة

* شوية بسيبيسة

* ابزار - ملح - خرقوم عواد - سكنجبير

* الثومة مدقوقة

* الحامض مرقد مدقوق

مقادير الحشوة :

* كروفيت

* جزرة منقية و محكوكة غليظة شوية

* قرعة خضرة محكوكة 

* شومبنيو كحل مرطب في الما

* زيتون خضر مقطع

* حامض مرقد مقطع رقيق 

* الشعرية الصينية

* الزبدة

* التخليطة فيها : شوية من مطيشة الحك - الهريسة- قزبر و معدنوس- عصير الحامض 

    - صلصة الصوجا - ملح - ابزار - تحميرة - كمون - سكنجبير

الطريقة :

* ناخد الدجاج نغسلوهم و نخليوهم ينشفو تم نوجدو الشرمولة و نحاولو نشرملوه بها مزيان من الداخل و ما بين الجلدة و اللحم و نعملو شقات في اللحم بالسكين تحت الجلدة باش تشرب الشرمولة و نخليوهم يرتاحو .

* ناخد الجزر و القرعة و نشحروهم بشوية من التخليطة نحطهم في اناء و نضيفو عليهم الزيتون و الحامض المرقد و الشمبنيو الكحل لي قطعناه صغير و الكرفيت لي حتى هو شحرناه مع التخليطة و الشعرية الصينية لي رطبناها و قطعناها صغيرة نخلط الكل و ندقوه الا ناقصاه العطرية نزيدو شوية من التخليطة. ثم نعمرو به الدجاج و نخيطوه و نربطوه كله باش يبقى مجموع.

* ناخد ورق الألمنيوم و نسرح وسطه ورق الطبخ و نحط الدجاجة الوسط و نسد عليها مزيان نستف الدجاج في اللاطة و ندخله الفرن و نخليه يطيب على خاطره ملي يطيب نفتح على الدجاجة ندهنها بالموطارد مخلط مع الهريسة و ندخله يتحمر و بالصحة و الراحة.